10 góðir lesivanar

Tey flestu av okkum kenna tað. Vit elskaðu at lesa, tá vit vóru yngri, og kundu liggja til langt út á náttina og bara lesa. Bókin var ongantíð longri burturi enn í taskuni og altíð í tonkunum. Tá ein bók var liðug, lá tann næsta klár. Og tann triðja. Tað var ein hungur, sum alla tíðina mátti fóðrast. Men so broyttist okkurt. Lívið fyltist við skúlatingum, arbeiði, frítíðarítrivum, børnum, vinum osfr. Og bøkurnar? Tær eru skiftar út við Netflix og Instagram, og tað vanligasta, tú lesur í dag, eru pinkubarnabøkur, matuppskriftir og kanska bindiuppskrift.

Men kanska tú saknar at hvørva eina løtu saman við einari góðari bók? Tað vilja vit fegin hjálpa tær við og geva tær her 10 góð ráð til, hvussu tú fært tær góðar lesivanar og kanst endurfinna tína lesigleði.


1. Tak eina avgerð um, at tú vilt lesa bøkur

Tað er hørð kapping um títt uppmerksemi, og tí noyðist tú at taka eina avgerð um, at tú vilt lesa. Ein noyðist at gera sær greitt, at tað er eitt tilvitað val, ein ger sær, tí tað er so lætt at villast inn á sosialar miðlar og annað, sum órógvar. Lurta t.d. eftir einari ljóðbók og kenn friðin í bert at hugsavna teg um orðini, tekstin og upplesturin, sum er satt njótilsi fyri heilan. Við at lesa eina bók ella lurta eftir einari ljóðbók kanst tú sjálv avgera ferðina og leggja hana frá tær, tá tú hevur tørv á tí.


2. Les av áhuga

Les bøkur, sum hava tín áhuga, so tú upplivir eina lesigleði og ikki lesitvingsil. Tað er ikki neyðturviliga eitt gott hugskot at kasta seg yvir Krig og fred ella Ulysses, bara tí tú veitst, at tað eru stór bókmentalig verk, og tí 'átti' tú at lisið tey. Tað finnast hópin av smærri forløgum og útgevarum við spennandi høvundum á sínum útgávulistum. Ansa eisini eftir stóru marknaðarføringsmaskinuni, sum peika tær á fyrstu og bestu krimiskaldsøguna. Vel bøkur, sum viðgera evni, ið hava tín áhuga.


3. Set tíð av – ikki síður

Set tær mál fyri tína lesing. Royn og lat vera við hugsa um kapitlar ella síður, og set í staðin tíð av. Tað hevur nógv at siga í mun til, um ein røkkur sínum málum. Summar dagar er ein klárari í høvdinum til at lesa enn aðrar dagar, og hevur tú sett tær fyri at lesa 100 síður, kann tað gerast ein størri gloypibiti ein dag, har orkan ikki er til tað. Setur tú tær harafturímóti at lesa millum kl. 20-21, gongur tíðin jú, meðan tú lesur. At seta sær mál á hendan hátt kann hava nógv at siga fyri, um tú fært nakra gleði av at lesa, ella um tað kennist sum tvingsil.


4. Hav altíð eina bók hjá tær

Fá tær til vana at hava eina bók hjá tær. Tak hana fram, tá tú hevur eina fríløtu. T.d. kanst tú lesa nakrar síður í bussinum, ella meðan tú bíðar eftir vinkonuni á kaffistovuni í staðin fyri at seta teg við Facebook ella Instagram.


5. Set lesing inn í álmanakkan

Setur tú tær fyri at lesa meira, kanst tú seta tínar lesiætlanir inn í álmanakkan. Líka sum við rørslu, ítrivum og øðrum, sum tú fyllir títt lív við, so minnir tú teg sjálvan á, at tú hevur lovað tær sjálvum at lesa meira. Kanska er kjansurin soleiðis størri fyri, at tú setur teg við einari bók heldur enn at tendra Netflix? Sum við so nógvum øðrum krevst daglig venjing fyri at koma á lagi við at lesa. Les tí eitt sindur hvønn dag.


6. Finn eitt gott stað at lesa

Kanska tú trívist væl við at sita millum onnur og lesa heldur enn at sita friði heima við hús? So kundi tað verið eitt hugskot at funnið eina kaffistovu, eitt bókasavn ella at ganga ein túr við eini ljóðbók í oyrunum. Er veðrið til tað, kann tað eisini vera deiligt at seta seg útum ella at finna ein bonk at njóta bókina, frísku luftina og ein kaffimunn í senn. Tað snýr seg um at leysríva seg frá tí gerandisliga og halga seg til søguna. Og so er tað ofta ein kærkomin flýggjan frá uppvaskinum, vaskiklæðunum og øllum hinum húsligu skyldunum.


7. Lurta 

Tað er er reint marglæti at lata onkran lesa eina søgu upp fyri einum. Og tað at lurta eftir einari ljóðbók er sum at gerast barn aftur, tá tey vaksnu fortaldu okkum søgur. Tað er eitt rættiliga intimt rúm, har tú ert einsamallur við røddini í oyranum. Royn tað.


8. Les fleiri í senn

Tað kann vera strævið at renna runt við Krig og fred í taskuni, men tað ber til at hava gongd í fleiri bókum í senn. Hav t.d. ymiskar bøkur til ymisk endamál. Hav eitt nú eitt yrkingasavn í taskuni, sum er lætt at lesa og ikki krevur so nógv av tær, og har tú ikki noyðist at bróta lesingina av, tí tú skalt úr bussinum.


9. Les áðrenn songartíð

Les heldur eina bók enn at liggja og hyggja eftir Netflix til langt út á náttina. Tað finst lítið betri enn at merkja møðina skola inn yvir ein og tungu eygnalokini detta saman, áðrenn ein sovnar við bókini á búkinum. Tú svevur nógv betri av einari bók enn eftir at hava hugt eftir Bonderøven í fleiri tímar.


10. Kappast við teg sjálvan

Halt yvirlit yvir, hvat tú lesur. Hav eina lummabók, har tú skrivar heitið á bókunum niður, sum tú hevur lisið gjøgnum árið, set tær mál og royn so og kappast við teg sjálvan um at lesa so nógvar bøkur sum gjørligt.


Kelda: vice.com

1/0

SAMBAND

SNARVEGIR

FYLG OKKUM

  • White Facebook Icon
  • White YouTube Icon
  • Instagram

Føroyar lesa skal vera við til at skapa lesigleði, seta føroyska málið í miðdeplin og skapa karmar fyri eini góðari lesimentan.

© 2021 Føroyar Lesa | Heimasíða frá savna.fo