Grafiskar skaldsøgur

15.09.20

Grafiskar skaldsøgur til stór børn og ung bjóða lesaranum eina øðrvísi bókauppliving, har myndirnar eru við til at siga søguna. Ein grafisk skaldsøga er ein skaldsøga, sum í bygnaði er nakað sum ein teknisøga við nógvum myndum. Grafiskar skaldsøgur kunnu vera góðar hjá teimum, sum vanliga ikki tíma so væl at lesa - og so eru tær eisini bara hugtakandi og vakrar!


Her eru 7 góðar grafiskar skaldsøgur til stór børn og ung:


Askur & Embla

Askur og Embla handlar um ein bonk, ein drong og eina gentu í einum lítlum býi á einum torgi aftan fyri standmyndina av Aski og Emblu. Drongurin byrjar at fantasera. Og í øllum ævintýrum við tær sjálvum í høvuðsleiklutinum endar alt lukkuliga. Skálkarnir fáa tað, teir hava uppiborið, hetjan verður fagnað og mussað. Tekstur er á vinstru síðu og svørt-hvít mynd á høgru síðu. Ein øðrvísi, stutt skaldsøga, sum er skjót og løtt at lesa.


Rithøvundur: Per Nilsson

Myndprýðari: Daniel Ahlgren

Týðari: Høgni Mohr

Síður: 204

Forlag: Bókadeild Føroya Lærarafelags


Dagar, eg havi gloymt

Søgan fer fram um summarið, tá ið alt tað besta og tað ringasta hendir í senn. Dávið er forelskaður í Lisu. Tað er vinmaðurin Tomm eisini. Lisa velur Dávið, men ger tað so liðugt við hann stutt eftir, at tey hava skeldast. Síðan hvørvur Lisa á gátuføran hátt.


Rithøvundur: Arne Svingen

Myndprýðari: Mikael Noguchi

Týðari: Niels Jákup Thomsen

Síður: 192

Forlag: Bókadeild Føroya Lærarafelags


Upplivingarnar hjá John Blake: Gátan um spøkilsisskipið

Kom við John Blake og manningini á Mary Alice á ógloymandi upplivingar teirra, har tey ferðast á høgu aldukambunum og aftur og fram í tíð. Eitt illveður rakar eitt lítið seglskip við eini familju umborð, og unga gentan fer fyri borð. John Blake kavar eftir henni og fær hana umborð á sonevnda spøkilsisskipið. Manningin roynir at fáa hana aftur í hennara egnu tíð og má tí sigla til eitt stað, har lív og skip verður sett í váða.

Rithøvundur: Philip Pullman

Myndprýðari: Fred Fordham

Týðari: Lena Jacobsen

Síður: 156

Forlag: Bókadeild Føroya Lærarafelags


Hjartastormur/Stormhjarta

Uppliva dreingir og gentur forelskilsi upp á sama máta? Sama søga verður søgd bæði úr sjónarhorninum hjá ávikavist Stormi og Viólu, tú skalt bara venda bókini við. Søgan nertir við alt millum himmal og jørð, sum hevur við tannáringalívið at gera. Bókin er vakurt myndprýdd.

Rithøvundur: Annette Herzog

Myndprýðari: Katrine Clante og Rasmus Bregnhøi

Týðari: Guðrið Rubeksen

Síður: 120

Forlag: Bókadeild Føroya Lærarafelags


Pssst!

Hví eri eg akkurát tann, sum eg eri? Hvat var eg, áðrenn eg bleiv fødd, og hvat verði eg, tá eg doyggi? Hevði eg eisini verið eg, um eg varð fødd onkra aðrastaðni? Hvør eri eg í grundini? Bókin varpar ljós á smáar og stórar spurningar í lívinum hjá 12 ára gomlu Viólu, og vit fáa innlit í tankar hennara um lívið, deyðan, vinir, familju, einsemi, útsjónd og popularitet. Ein still og poetisk kanning av samleika, og hvussu tað er at vera genta í dag.


Rithøvundur: Annette Herzog

Mynprýðari: Katrine Clante

Týðari: Guðrið Rubeksen

Síður: 96

Forlag: Bókadeild Føroya Lærarafelags


Zenobia

Ein nemandi søga um borgarakríggið í Sýria. Ein fiskibátur, ovurfyltur við flóttafólki, hvølvist í Miðjarðarhavinum. Umborð á bátinum er gentan Amina, sum druknar saman við øllum hinum umborð. Meðan hon søkkur, verður hennara stutta lívssøga søgd í afturlitum. Í skiftandi litum og ljósi verður klipt aftur og fram millum fortíð og nútíð. Millum brúna kríggið í Sýria og myrknandi bládýpið. Amina minnist, hvussu hon flýddi gjøgnum krígsherjaða Sýria saman við pápabeiggjanum, sum bjargar henni umborð á bátin, men sjálvur má standa eftir.


Rithøvundur: Morten Dürr

Myndprýðari: Lars Hornemann

Týðari: Oddfríður M. Rasmussen

Síður: 110

Forlag: Bókadeild Føroya Lærarafelags


Hvíti fuglur

Julian skal skriva eina uppgávu í samfelagsfrøði og ringir til ommu sína. Hon fortelur honum sína ótrúligu lívssøgu. Sum ung genta krógvaði hon seg fyri nasistunum undir seinna heimsbardaga í Fraklandi. Hetta er ein søga um ljósið í myrkrinum, um ómetaligt dirvi, vinalag og kærleika.


Rithøvundur og myndprýðari: R.J. Palacio

Týðari: Ása H. Ellefsen

Síður: 220

Forlag: Bókadeild Føroya Lærarafelags